2025−2026-yillarda Oʻzbekistonda aholini roʻyxatga olish ishlari oʻtkazilishi rejalashtirilmoqda. Bu haqda 2024-yil 4-mart kuni Prezident imzolagan qaror ilovasida belgilab qoʻyilgan.
Prezident qarori bilan tasdiqlangan “Rasmiy statistika sohasida islohotlarni chuqurlashtirish boʻyicha Yoʻl xaritasi”da statistika idoralariga 2025−2026-yillarda aholini roʻyxatga olish ishlarini tashkil etish vazifasi yuklatilgan.
Yoʻl xaritasida 2024-yil davomida aholini roʻyxatga olishni oʻtkazishga tayyorgarlik koʻrish ishlarini davom ettirish belgilangan.
Jumladan:
- aholini roʻyxatga olishni aholining keng ommasiga tushuntirish boʻyicha targʻibot-tashviqot ishlarida foydalanish uchun videorolik, banner, flayer va bukletlar tayyorlash;
- 2021-yilda oʻtkazilgan sinov natijalari va xalqaro ekspertlarning tavsiyalari asosida aholini roʻyxatga olish savolnomalari shakllarini takomillashtirish;
- xalqaro tajriba va ekspertlar tavsiyalari asosida “Aholini roʻyxatga olish” axborot tizimini takomillashtirish;
- “STATA” amaliy dasturiy paketi litsenziyasini xarid qilish va unda roʻyxatga olish natijalarining chiquvchi jadvallari namunalarini shakllantirish;
- aholini roʻyxatga olishning tashkiliy rejasini ishlab chiqish vazifalarini amalga oshirish belgilangan.
Aholini roʻyxatga olish esa 2025−2026-yillarda oʻtkazilishi, natijalar 2026−2027-yillarda tayyorlanishi va eʼlon qilinishi belgilangan.
Oʻzbekistonda aholini roʻyxatga olish umummilliy tadbiri 2022-yilda oʻtkazilishi kerak edi. Xususan, 2019-yil 5-fevralda “Oʻzbekiston Respublikasida 2022-yilda aholini roʻyxatga olishni oʻtkazish konsepsiyasini tasdiqlash toʻgʻrisida”gi prezident farmoni, 2020-yil 16-martda “Aholini roʻyxatga olish toʻgʻrisida”gi qonun qabul qilingandi.
Keyinchalik koronavirus pandemiyasi tufayli mazkur tadbirni oʻtkazish muddati uzaytirildi. Vazirlar Mahkamasining 2020-yil 11-noyabrdagi “Oʻzbekiston Respublikasida 2023-yilda aholini roʻyxatga olishga tayyorgarlik koʻrish va uni oʻtkazish chora-tadbirlari toʻgʻrisida”gi qaroriga koʻra, respublikada aholini roʻyxatga olish ishlari 2023-yilning 1-25-noyabrida oʻtkazilishi belgilangandi. Biroq bu tadbir 2023-yilda ham amalga oshirilmadi.
Maʼlumot uchun, Oʻzbekistonda soʻnggi marta aholini roʻyxatga olish ishlari sobiq ittifoq davrida, 1989-yilda oʻtkazilgan.
J.B.Bekchanov
Xoram viloyati statistika boshqarmasi
Roʻyxatga olish jarayonlarini
tashkil qilish va oʻtkazish boʻlimi
boshligʻi